María José Tallón, agricultora e obradoiro de transformación Trasdeza Natur – Cardigonde, Cortegada, Silleda, Pontevedra

María José dedícase á agricultura ecolóxica e ten “un espazo para procesar produtos da horta, tanto froitas como verduras”, a empresa Trasdeza Natur. Aínda que de nena cultivaba a súa propia horta, a súa conexión co campo profundizouse tras varios anos traballando nunha oficina. A súa decisión de dedicarse á agricultura estivo motivada pola busca dunha saída profesional e pola opción de traballar por conta propia. “Foi un cambio radical, de estar metida nunha oficina a traballar ao aire libre, ao sol, en contacto coa terra. É completamente diferente e, ao mesmo tempo, moi gratificante”, afirma.

Na súa empresa dedícase principalmente a deshidratar froita, un proceso que leva a cabo con deshidratadores solares alimentados con enerxía renovable. A innovación e a sustentabilidade son fundamentais no seu proxecto, e ten un acordo de colaboración coa Universidade de Santiago de Compostela para desenvolver deshidratadores solares. “O sol actúa como fonte de enerxía e, cando non hai sol, temos enerxía fotovoltaica. Este proceso permítenos conservar os produtos sen aditivos, conservantes nin azucre. É simplemente froita natural”, explica.

A idea de deshidratar a froita xurdiu porque un dos seus fillos non quería comer froita fresca. María José comezou a investigar sobre o proceso de deshidratación e formouse neste campo. “Ao principio facíao cun pequeno electrodoméstico na casa. Era como unha especie de chicle, porque a froita quedaba concentrada e empezou a gustarme máis”, lembra cun sorriso. Co tempo, perfeccionou o proceso e comezou a ofrecer un produto cen por cen natural, sen conservantes nin azucres engadidos, o que lle permitía conservar mellor as propiedades da froita fresca.

A pesar do seu éxito na produción de froita deshidratada, María José afirma que existen varios retos. Sinala que os pequenos proxectos teñen que loitar moito máis para ser visibles e obter axudas ou subvencións, xa que as políticas actuais favorecen as grandes infraestruturas, o que dificulta o desenvolvemento de iniciativas de autoemprego no medio rural: “Os grandes proxectos agroindustriais son os que reciben máis axudas e aos pequenos cústalles máis facerse ver; a falta de renovación do sector rural é evidente”, comenta.

Unha das loitas adicionais ás que tivo que enfrontarse María José é a discriminación de xénero nas zonas rurais. Aínda que recoñece que cada vez hai máis mulleres liderando proxectos agroalimentarios, cre que a miúdo as mulleres teñen que traballar máis para seren recoñecidas. “Os homes sempre están solicitados, os ‘bos homes’, e nós temos que loitar un pouco máis por ser mulleres. Pero sempre se abren portas”, afirma.

Para ela, o futuro da agricultura pasa pola sustentabilidade e a produción ecolóxica. “Coidar o medio ambiente é fundamental; a responsabilidade que tes como terratenente debe reflectirse no coidado da terra, é dicir, o capital non prima sobre a terra, senón que hai que coidar a terra”, afirma. María José está convencida de que o modelo de agricultura ecolóxica é o que debe prevalecer, xa que ofrece alimentos máis saludables, sen produtos químicos nin pesticidas. Segundo ela, consumir produtos ecolóxicos é unha opción máis saudable, xa que a froita deshidratada conserva todas as súas propiedades nutricionais sen ser alterada por produtos artificiais. “É un produto moi saludable, unha alternativa aos produtos procesados. É natural, o que eu ofrezo é saúde”, conclúe.